عــدنــا بــحــدوتــه

مش فاكر امتى اخر مره كتبت هنا
ومش عارف اصلا انا ليه بعدت عن الكتابه وبطلت اكتب - واحد قالى اللى بيحب يكتب عمره مايعرف يبطل
بس انا مش بطلت ومش عارف انا ايه
يمكن كسل اه
استهتار اه
هبل وعبط اه
لكن بطلت لا
اناكنت بكتب واعمل الموضوع واكسل انقله هنا- لدرجة انى ممكن انزل مواضيع قديمه انا كتبتها
صحيح مش هيبقى ليها طعم زى لو اتكلمت عنها فى وقتها - بس تقولوا ايه بقى
عبط!
حلوه تقولوا ايه دى - كان فى حد بيقرالى بجد - مع انى عارف انى بكلم نفسى
الفتره اللى بطلت فيها اكتب دى - مش بطلت بردوا اسمها مش كنت بكتب- حوالى 7 شهور
محدش حس انا كنت بكتب او لا او حتى حد اهتم وقالى انت كتبت حاجه جديده ولا لأ ؟!
المهم سيبكم من الرغى ده كله - تيجو احكلكوا حدوته احلى واحسن من كلامى ده اللى ولا هايودى ولا هيجيب...

صلوا ع النبى بقى كده - وجهزوا الشاى واعتبروها فيلم- او مش تجهزوا الشاى واعتبروها حكاية قبل النوم
هههههههههههههههه - سبحانك ربى لسه بقلكم جهزوا الشاى النت فصل
ف حاجه تحس انها دايما واقفه قدامك كل اما تبتدى تعمل حاجه !
المهم الحمد لله ..
نحكى بقى صح

بيقلك واحد كان راكب اتوبيس وراجع من شغله وكان يوم وقفة عرفه والناس صايمه وهو قابض والموظفين كلها قابضه ولاحظ ان فى راجل كبير السن
واحد ماشى وراه من ساعة ماركب الاتوبيس - فالواحد ده حس ان اللى ماشى وراه ده حرامى فخاف على الراجل الكبير وشكله كان لسه قابض المعاش بتاعه
فراح ووقف بين الراجل الكبير والحرامى وفصل بينهم - والحرامى من عادته انه بيتحرك كتير ومره واحده الحرامى بطل حركه
ع فكره النت رجع
فالواحد حس بكده فقال هو الحرامى ماله - فبيشوف جيوبه لقى نفسه اتسرق - ومره واحده لف للحرامى ومسكه من رقبته وشل حركته- ماحدش يقلى ايه الفيلم الامريكانى ده -
المهم قاله طلع الفلوس
ع فكره النت فصل تانى
الحرامى استعبط قاله فلوس ايه- قاله الفلوس اللى لسه سرقها وشد على رقبته جامد- الحرامى استسلم وطلع جرنال
ورمى منه الفلوس بتاعت الواحد ده ع الارض
الواحد قال للراجل الكبير انزل هاتها عشان كل ده بسببك
وقال للناس حد اتسرق منه حاجه - حد اتسرق منه حاجه وكررها كذا مره- والكل عمل من بنها وماحدش رد
ومش فاهم اشمعنى بنها يعنى - المهم هى بتتقال كده
الواحد قال للحرامى لولا انه عيد كنت ويدتك القسم- وسابه ونزل
اول مانزل - اتنين بيتقال انهم رجاله اه والله قاموا وقالوا امسكوه احنا اتسرقنا
الواحد بصلهم وقالهم لا مؤاخذه فى الكلمه انتم كلكم شوية جبانات وكلاب !

احكلكم حكايه كمان ولا كده كفايه .. لو الشاى خلص قوموا اعملوا تانى او جربوا النسكافيه بيبقى حلو مع الافلام الهندى دى
صلى ع النبى تانى .. بيقلك واحد ومراته راكبين بردوا الاتوبيس - وع فكره نفس الاتوبيس الاولانى -
الست قعدت والراجل وقف ومكنش فى مكان عشان يقعد -وجه واحد وقف جنب الراجل ده
الست خدت بالها ان الواحد ده بيحسس على جيب جوزها- ابتدت تقلق على جوزها
نادتله قالتله تعالى هنا اقف جنبى- هو مكنش واخد باله قالها لا انا مستريح هنا خليكى مكانك
الاتوبيس كله حس بالحرامى ومعظم الاتوبيس عارف الشخص ده ومراته
نادوله وهو بردوا واقف مكانه ومش حاسس بحاجه - والست بتنادى-
الحرامى طلع مطوه وفردها على رقبة الست عشان تسكت - الست سكتت بس عيونها ابتدت اتتحرك يمكن جوزها يفهم
والناس شايفه المطوه وقعدت مكانها -ولا كان الموضوع يهمها وعملت نفسها مش شايفه حاجه
مع انهم عارفين الراجل ومراته - وحتى لو مش عارفينه - عملوا بردوا فيها من بنها ومش عارف بردوا اشمعنى بنها
ومره سالت واحد بنهاوى هم ليه بيقولوا عنكم كده - قالى عشان بنفض لاى حاجه - طالما شىء مش يخصنا او يهمنا خلاص يغور ويروح ف داهيه ..
عيش ندل تموت مستور يعنى !
ع فكره الحرامى معرفش يسرق حاجه - والراجل كان مأمن جيبه كويس - شكله كان عامل حسابه وقال طالما جيبى فى امان
خلاص مش مهم مراتى .. واهو بردوا الواحد يستريح وياخد نفسه شويه وكفايه الحكومه عليه !

احكلكم واحده كمان- ولا زهقتوا منى- اللى زهق يقول-
وعملا بمبدأ الحريه والديمقراطيه اللى ف بلدنا العزيزه- انا بردوا هاكمل واحكى- الا بقى لو واحد بس قالى اسكت وانكتم - ساعتها هاحط بلغه فى بؤى واسكت
واوعى حد يعتبره خوف ولا حاجه - استغفر الله- ده حبيبى وحبيبى الملايين ده ناجح ب99.9%
واكيد 0.1% كنت انا...
المهم...
3 نازلين من قطر وجايين من سفر ووصلوا المحطه- راجل عنده حاجه وتلاتين , وشاب فى بداية العشرينات
, وبنت محجبه بردوا فى بداية العشرينات محجبه ولبسها مفيهوش اى حاجه غلط ... والتلاته ملهمش اى علاقه ببعض - كانوا فى القر سوا وبس ..
نازلين ع السلم البنت قدام والشاب والراجل ورا
البنت نازله ع السلم عادى - وكل شويه تحس بايد حد بيلمسها - فتبص لورا وتسكت
كل اما تنزل سلمه - حد يلمسها وهى تبص لورا وتسكت
موضوع اللمس اتكرر حوالى3لـ4 مرات
وهى ساكته - وماحدش اتكلم - لحد ماوصلت اخر السلم- وراحت باصه لورا
وبصت بصة احتقار للشاب وراحت ماشيه !
هى افتكرت انه هو اللى كان بيلمسها ..
بس مكنش هو وهى ظلمته - كان الراجل هو اللى كان بيلمسها وبيعمل كده
بس هو كان شايفه وهو بيعمل كده
وسكت !
وهى كمان سكتت عن حقها...
ومصر بردوا بيحصلها كده .. بس الفرق ان الحرامى والمغتصب واحد
وان هى مش بتقدر تتكلم او تدافع عن حقها ..
واحناكلعاده هنفضل ساكتين - لامتى بقى - مش عارف الله اعلم !

خلصتوا الشاى - ولا نمتم ولا زهقتم منى ونفضتم وقمتم ؟...
يالا ماعلينا
ع رأى الحاج هيكل اللى مش عارف هو حج ولا لأ ...
تصبحوا ع خير...
صحيح للأخذ ف العلم فقط ... النت لسه مرجعش..
حلوه اللغه العربيه دى صح
!

شخبطه

كل يوم بعرف ان الاحترام والاخلاق والكرامه
ملهمش علاقه بدين او جنس او حتى وطن
وبعرف ده لما ببص لماجده الرومى وفيروز
وبعدين ابص على هيفاء وهبى
وعرفت ده اكتر لما شوفت مظاهرات اليونان
ورجعت تانى بصيت ع خيبتنا


بتفرج على النيل للاخبار ولقيت فى شريط الاخبار
لقيت واحد اسمه حازم حسام او حسام حازم
والقناه كاتبه انه خبر حصرى
ان الاستاذ حسام ده قالهم ان جميع الخرائط تثبت ان غزه
ارض فلسطينيه !
ياريت اللى يعرف مين الاخ ده يقولى عشان نفسى اعرف هو جاب المعلومه الجباره دى منين


قبل ضرب غزه بيومين لقيتهم كاتبين فى شريط الاخبار ع الفضائيه المصريه اللى مشرفانا دايما
ان الريس دعى الاخت ليفنى للحضور الى مصر لمقابلته ...
وبعد ضرب غزه بردوا بيومين لقيت الحاج ابو الغيط بيقول ان لما نيفه هانم كانت هنا
قصدى الاخت ليفنى كانت هنا عشان نطلب منها عدم ضرب غزه و لتهدئه الوضع فى المنطقه
اه يانى يامنطقتى !


مكتوب فى شريط اخبار الجزيره ان رئيس وزراء قطر ابلغ ليفنى انه غير موافق ع ضرب غزه !
طيب ياعم الحاج طالما انت واصل كده وبتعرف تتكلم اهو ماتقلهم ان قطر هتقطع العلاقات اللى بينها وبين اسرائيل
اوع الاقل كلم بوش وقوله عن القواعد العسكريه اللى موجوده فى الخليج وخصوصا فى قطر ..
وهو من الاصل كان فى حد سألك عن رايك !


مكتوب كده فى الاهرام
زوجة الشهيد(مرات الظابط المصرى اللى اتقتل فى رفح)
حماس قتلت زوجى !
وخد بالك مراته هى اللى قالت
يالا ربنا يصبرها ويصبرنا احنا كمان ع الاهرام


وانا بتفرج ع المظاهرات بتاعت غزه
(لسه جوايا خوف انى اطلع المظاهرات)
لقيت واحد بيقول بكل مافيه يسقط يسقط حسنى مبارك
حصلتلى حالة فرح ومش عارف ليه افتكرت محمد وفيق فى فيلم شىء من الخوف
وهو بيقول باطل .. باطل


اللى طلعوا مظاهرات غزه مش المفروض الاول نحرر مصر
وبعدين نحرر القدس وغزه
ونحرر نفسنا من الحصار اللى الريس معيشنا فيه
ولا انتم كاتبين فى اليفط .. مصرى محاصر
كمشاركه معنويه يعنى !


بموت ع نفسى من الضحك وانا بتفرج على نشرة الساعه 9
بتاعت القناه الاولى وهى بتتكلم عن حماس كأنها هى اللى ضربت اسرائيل
وخصوصا هناء السمرى دى عسل عسل يعنى
ياخراشى !

الامارات عامله 3 ايام حداد وقافله الفضائيات بتاعتها
عشان واحد مات عندهم باين من العيله المالكه
ولما 400 يموتوا فى غزه ده غير العراق وافغانستان متديش حتى نص يوم حداد اجازه للعيال
اكيد دم العيله المالكه غير دم شهداء غزه بردوا !



قناة الناس كاتبه غزه فى قلوب الناس .. يافرحتى بقلوب ميته
وقناة الرساله نازله سحب فلوس ع حس غزه برسايل الموبايل
وقناة اقرأ مقضياها شريط دعاء
والشات ع قنوات التانيه حاجه تعر وتكسف
بجد جتها نيله اللى عاوزه خلف زى خلفنا .. فكرونى بقصيدة نزار قبانى متى يعلنون وفاة العرب

أحاولُ منذُ بدأتُ كتابةَ شِعْري

قياسَ المسافةِ بيني وبين جدودي العربْ.

رأيتُ جُيوشا...ولا من جيوشْ...

رأيتُ فتوحا...ولا من فتوحْ...

وتابعتُ كلَ الحروبِ على شاشةِ التلْفزهْ...

فقتلى على شاشة التلفزهْ...

وجرحى على شاشة التلفزهْ...

ونصرٌ من الله يأتي إلينا...على شاشة التلفزهْ...


أيا وطني: جعلوك مسلْسلَ رُعْبٍ

نتابع أحداثهُ في المساءْ.

فكيف نراك إذا قطعوا الكهْرُباءْ؟؟



لحد دلوقتى جمال مبارك متكلمش عن غزه
وسرور وصفوت الشريف سكتم بكم ..
ربنا يستر !



حد يفهمنى ياريت..
ايه الجديد يعنى لما غزه تنضرب ؟
ماقبلها رام الله انضربت وفلسطين كلها ولبنان
والعراق والبوسنه وافغانستان والمسلمين فى كل مكان متهانين
حتى فى مصر متهانين
على راى حسن حسنى فى فيلم ليلة سقوط بغداد
افتح يابنى القوس ومتقفلوش ...
يعنى احنا متعودين ع كده
والحمد لله بقينا جبلات ومعندناش دم !


الاخ احمد المسلمانى اللى دايما علطول فاكر نفسه جايب الديب من ديله
كان بيتكلم عن اوباما وانه قال ان اسرائيل زى بناته!
ياريت الاخ الامور يتفرج على حلقاته ورأيه فى اوباما ايام الانتخابات
وقبل مااوباما ينجح عشان يشوف هو كان بيقول عنه ايه ...


الهبله العبيطه منى الحسينى نفسى اعرف بجد جنس جبلتها ايه الست دى
وهى قاعده وسامعه بودانها المسيحى بيقلها انا غير معترف بسيدنا محمد كرسول
والبهائى شمتان فيها وقاعد يضحك عليها عشان عارف انها مش هاتقدر تفتح بؤها
لا وتقوله بكل بجاحه فى حرية وكل واحد حر !
طالما كل واحد حر كده يافالحه جايبه البهائى ده ليه ونازله فيه اسئله رخمه زيك وعامله فيها راجل
وحامى حمى الدين ...
شاطره تتشطرى عليه .. سبيه ع الاقل ده بيقول انا معترف بسيدنا محمد كرسول
جتك خيبه انتى والمسلمانى فى يوم واحد

السيد الوزير احمد ابو الغيط .. احب اعرف سيادتك من انهى غيط بالظبط !


الحاج ابومازن قال عن مشكلة الحجاج الفلسطينين اللى اتحجزوا فى معبر رفح
ان اللى منع الحجاج كان كفار قرش ... وسعادته يقصد حماس
احب ابشر سيادته ان كفار قريش اسلموا والحمد لله !


هو ليه صحيح كل اللى فى فلسطين اسمه ابو !


من فيلم ليلة سقوط بغداد ...
الثوار دايما عايشين تحت فى البدروم وعمرهم ماطلعوا فوق


من فيلم ليلة البيبى دول ( العبيط اوى اوى اووووووى يعنى) ...
الاشتراكيه هى العدل والعدل هو اننا نقسم لحمة الحمير بينا وبين الاسود بالتساوى


فيلم جنينة الاسماك ...
فكرته حلوه بس كان ممكن يتعمل ابسط من كده بدل الرموز والرمزيات اللى المخرج مالى بيها الفيلم
وعاوز مخ فاضى عشان يفهمها


لما الزمالك خرج من الكاس واتغلب من بنى عبيد
حسيت ان لاعيبة بنى عبيد دول هزموا اسرائيل فى الحرب


مش عارف والله اضحك ولا اعيط ع خيبتنا التقيله
الحاجه الوحيده اللى استفدناها من ضرب غزه
ان جمهور الاهلى والاسماعيلى اتصالحوا !
ع فكره بعد الماتش باين اتخانقوا .. يعنى يافرحه ماتمت


عادة الحكومه ولا هاتشتريها .. اى ازمه تحصل لازم تخلى معاها مشكله فى الكوره
ايام ازمة العيش طلعوا مشكلة الحضرى
ودلوقتى عاملين مشكلة الزمالك وحسام وابراهيم ...


نفسى بجد اعرف ابوتريكه عمل وقدم ايه لمصر ؟!
الدمعه كانت هتفر من عينى لما عرفت انه ساب فلوس السعوديه عشان خاطر مصر والجماهير
هو لامؤاخذه يعنى الاخ هيلعب فى مصر ببلاش يعنى ولا ايه
!

بيقلك عمرو زكى مفرحش لم دخل اخر جون _ لا وايه بيقلك انه سجد سجدة شكر لربنا
ازاى يعمل كده ؟
ازاى يسجد لربنا وميفرحش
اخوه بأه فسر الموضوع ده بان عمرو زعلان لانه بأله كتير ملعبش ومسجلش اجوان
ياحينى ياعموره
فلتلك 100 مره انت وميدو متنسوش تغيروا بليل واستعملوا بامبرز عشان تخلوا دايما اسم مصر عاليا رفرافا
فى سماء الهيافه !


كان التليفزيون السعودى لذيذ اوى وعسل جدا لما كان عامل تقرير عن العيديه فى مصر
فى نفس الوقت اللى كان بيجلد فيه الدكتور المصرى !
بس العيب مش فى السعوديه .. العيب علينا احنا اننا سايبين واحد اسمه مبارك يعمل ريس علينا
سعادته سافر وناقش الاوضاع فى المنطقه والشرق الاوسط والعلاقات الاخويه بين البلدين
ومكلفش خاطره يسأل عن اخبار المصريين هناك او حتى عن قضيه الدكتور
بس اكيد سعادته ميعرفش عشان هو بينام بدرى ومبيلحقش اونكل تاموره فى البيت بيتك !


سمعت من واحد والله اعلم انهم مسكوا ف السعوديه مهندس مصرى جاسوس
ونفسى اسال الجهابذه بتوع السعوديه .. مصر هتجسس ليه عليكم ؟
يمكن نفسها مثلا فى تأشيرة حج زياده !


بيقلك السعوديه بتلم تبرعات لغزه ..
مع ان امريكا وانجلترا كانوا طالبين مساعده من دول الخليج عسان الازمه الاقتصاديه
جتنا القرف هنفضل طول عمرنا شاحتين وبخلاء
حتى احنا فى شهر المحرم مش رمضان كمان ...
وبردوا فكرونى بمتى يعلنون وفاة العرب ..

أنا...بعْدَ خمسين عاما

أحاول تسجيل ما قد رأيتْ...

رأيتُ شعوبا تظنّ بأنّ رجالَ المباحثِ

أمْرٌ من الله...مثلَ الصُداعِ...ومثل الزُكامْ...

ومثلَ الجُذامِ...ومثل الجَرَبْ...

رأيتُ العروبةَ معروضةً في مزادِ الأثاث القديمْ...

ولكنني...ما رأيتُ العَرَبْ!!...





الناس اللى شكرت النواب على تاشيرات الحج
لامؤاخذه يعنى هم دافعين حقها من جيب ابوهم ...



مكتوب كده ع يفطه متعلقه فى نص الشارع .. اللى بيحب مصر ييجى معانا_ لجنة المرأه فى الحزب الوطنى الديمقراطى
كان نفسى اعمل بايدى حركة ابراهيم حسن اللى كل ماتش بيعملها
بس لقيت كل الناس بتبصلى
ضحكت ومشيت وقلت فى نفسى الحمد لله ان اعضاء الحزب زى ماالحكومه بتقول انهم 2 مليون بس
يعنى فى 78 مليون واحد مش بيحبوا مصر !
حاجه تطمن صح ..


الشعب العربى اللى هاجم مصر فى كل حته وعمل مظاهرات قدام السفارات المصريه وكسرها وحرق علم مصر
بسأل سعادتكم هى مصر منعاكم يعنى تروحوا تحاربوا ..
ولا انتم سايبين الحمار وبتتشطروا ع البردعه !



استغربت لما ماقالوش فى اسرائيل ان شيخ الازهر رجل سلام وياريت كل المصريين زيه
زى مابيقولوا علطول عن مبارك
واستغربت اكتر ان شيمون بيريز مازروش لما تعب ودخل المستشفى !


الناس اللى بتتكلم عن المقاطعه
ياريت تقاطع المنتج المصرى كمان ..ده ان كان فى اصلا حاجه ببتتصنع فى مصر !


الناس اللى فرحت اوى ان بوش اتحدف بالجزمه فكرونى بالنكته باللى بتحكى
عن واحد امريكى وواحد عربى
فالامريكى بيقول للعربى : احنا بلدنا بلد حريه وديمقراطيه ومن حقنا ننقد الرئيس الامريكى ونشتمه كمان
العربى رد عليه وقاله : وايه يعنى مااحنا كمان نقدر فى بلدنا نشتم الرئيس الامريكى !


المنتخب الامريكى اللى هايواجه منتخب مصر فى كاس القارات ناوى يتعاقد مع رئيس وزراء العراق المالكى
بعد ماشافه وهو بيصد ببراعه ضربة الجزمه عن بوش
وهايوقفه مخصوص فى ماتش مصر ...


نفسى اعرف ازاى بوش وطى لما الفرده الاولى اتحدفت عليه .. وموطاش لما التانيه اتحدفت واستنى لحدما
رئيس الوزراء حاشها عنه
سبحان الله !


بصراحه بوش ده اثبت انه راجل كفاءه
فى ظرف اسبوع رد ضربة الجزمه بضربة صواريخ
وريحة الشراب ردها لحد دلوقتى ب400 شهيد !
ده غير اللى ااستشهدوا فى العراق وافغانستان ..
امال لو الجزمه برباط كان عمل ايه !


احنا ليه دايما بنقول عن اهل فلسطين بس هم اللى شهداء
واهل العراق وافغانستان او اى منطقه تانيه نقول قتلى
كأنهم مش مسلمين
!

صائب عريات او احمد قريع باين .. المهم حاجه فيها قرع وخلاص
قال بعد ضرب غزه ان كده المفاوضات بين فلسطين واسرائيل انتهت
وهو من امتى اصلا كان فى مفاوضات ياعم الحاج
صباح الخير بلييل يابه!


احلى حاجه فى حكومتنا انها دارسانا كويس وسيبانا نعمل مظاهرات ونعمل
اللى احنا عاوزينه اليومين دول
من يسقط يسقط حسنى مبارك لحد ملايين الملايين على غزه رايحين
عشان عارفه اننا مش هنقدر نشيل حسنى مبارك دلوقتى
واننا جبناء ومفيش واحد هايطلع حتى من بيته لحد رفح عشان غزه
عارفه اننا شعب كلام يعنى ..
وبعد ما الهيصه تخلص هتلم كله ...

اظن موضوع غزه ده جه ع الطبطاب للاخوان عشان تبين فيه مرجلتها
اللى هى مفقتقداها اصلا ..
وكلعاده مش هاتعرف تعمل حاجه غير شوية شعارات وهتافات وبس !
عشان الصراحه راحه ياحاحا
وانت مباتعرفش !



تحس ان الفلسطنين اتعودوا ع الضرب والغارات وبأه شىء عادى
انهم يكونوا محتلين علطول
واحد من المصابين بيقول انا كنت واقف جنب مدرستى والقنبله وقعت على
ورجلى اتقطعت وبيسال هو ذنبه ايه !
والتانى قاعد يقول هدموا بيوتنا وشردوا عيالنا
حسيت بخيبه ...



النهارده واحده من فلسطين من اهل غزه بتقول بكل عزه وفخر وكبرياء
انا وولادى واهلى ومالى وبيتى فى سبيل الله
وان شاء الله ربنا يعوضنى عنه ببيت فى الجنه طوبه من دهب وطوبه من فضه
ومهما عملوا مش هنتنازل عن ارضنا
فرحت وقلت الحمد لله
بس حسيت بعجز .. حسيت اننا معدتش فينا رجاله ولا نخوه ولا شجاعه
او حتى ذرة دم ..


يَا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الأَرْضِ أَرَضِيتُمْ بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ

التوبة 9 38

بس خلاص

مجرد اجتهاد

الاجتهاد هو فرع من فروع الشريعه له قواعد واصول
وليس بمقدور اى احد فينا ان يجتهد ويفتى ويشرع
ولكن عليه ان يستفى الشروط التى حددها العلماء فى المجتهد

وهذه مجرد محاوله بسيطه


حكمة المشروعيه هى تكملة لتعريف الشىء فى الفقه
فالتعريف يتكون منها وتعريف الشىء عند اهل اللغه وتعريفه عند اهل الشريعه

فمثلا الصلاه
لها تعريف لغة واصطلاحا وحكمة المشروعيه

ولكننا كمسلمين لسنا بحاجه لحكمة المشروعيه فيكفينا أمر الله ورسوله لنا وعلينا نحن الطاعه
ولكن الدين الاسلامى قام على مبدأ العقل والفهم والاختيار ولم يقم على الاكراه والامر والمغالاة فى الامور

وحكمة المشروعية المقصود منها تفهم ما الحكمة والمغزى من فعل هذا الشىءولما يتم فعله
وهى ايضا مفيده لغير المسلمين حتى يستوعبوا لما نفعل ذلك।

والاجتهاد يكون فى الفتاوى لانها تتغير بالزمان والمكان والسائل ومنهج وفكر الفقيه
،اما حكمة المشروعيه فتعريفها ربما يكون واحد ولا يختلف الا قليلا باختلاف تفيكر الفقيه

ومجرد اجتهاد سيكون عن الحج والجمعه

فالحج اصبح مجرد ركن فى الاسلام يجب ان يُفعل حتى يكتمل ويتم الدين
وصلاة الجمعه ايضا اصبحت مجرد صلاه تتم وربما هى الصلاه الوحيده التى تتم فى المسجد
ولا تجوز الا فى المسجد لذا يتم الاهتمام بها قليلا عن بقية الصلوات
واصبحنا نقوم بالجمعه بلا اى روحانيه او مشاعر واصبحت عندنا مجرد روتين اسبوعى كبقية الاركان
اللهم الا الحج لعدم الاستطاعه فعله اكثر من مره
ولوجوبه مرة واحدة فقط فى العمر يكون به روحانيه ومشاعر عالية وتقرب من الله
ولكن هذا كله يتم بدون ان نعرف لما شرع الحج والجمعه

قال تعالى

" يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ "
الحجرات - 62- 13

والله تعالى هنا قال ياايها الناس
فمابالنا نحن كمسلمين -من المفترض ان نكون قدوة ولكن يكفى علينا ان نكون قدوة فى اعلى معدلات مشاهده للمسلسلات،والمواقع الاباحيه

المهم

السبب هنا عام للناس وخاص للمسلمين

فالحج والجمعه يجتمع بهما عدد من المسلمين - ربما لن يقدر احد على تجميعهم لو اراد ذلك-
والحج من اسمائه الاجتماع

الجمعه تتم فى المسجد القريب منا او الذى يوجد فى منطقتنا ويجتمع بها جميع سكان المنطقه من نعرفه ومن لا نعرفه
اذا فهى وقت لاداء فريضه معينه وهى الصلاه والتعرف بين الناس
ولكن نحن لا نفعل ذلك نكتفى بمجرد الحضور والصلاه والذهاب وفقط
فهى شرعت للتعرف بين الناس والتحدث عن المشاكل التى تخص المنطقه او البلد الذى نسكن فيه وحلها
وكل ذلك بهدوء احتراما لبيت الله بدون اى مشاكل
ولاختلاف الناس ستختلف الاراء ويتم التشاور والتوصل لافضلها

وهنا مجرد عدد معين فى بلد مسلم

تخيل لو تلك المناقشه تمت فى الحج
فهو الاجتماع الكبير وتم فى هذا الاجتماع عرض مشاكل المسلمين والتوصل لحلها - فمن يقدر على جمع المسلمين الا فى هذا المكان الكريم

تخيل لو تم عرض مشكلة التوريث او التمديد فى الحكم فى صلاة الجمعه وتم اخذ الاستفتاء عليها
وتخيل ايضا وجود الامن فى المكان
ربما امن الدوله لا يحتاج الى تخيل فهو موجود فى كل مسجد

المهم

اى قوة امن هذه التى تقدر على جموع المصلين حتى لو كانوا بدون اسلحه
فلو صلوا بخشوع وتدبر ماهزتهم طلقة واحده او حتى دبابه فهم قد عبدوا الله حق عبادته فحفظهم الله بقوته
حتى لو لم يكونوا مسلمين
فيكفى الايمان بالحق ولننظر الى ماحدث فى الثوره البرتقاليه فى اوكرانيا لنعرف ان الحق لا يحتاج لمؤمن او كافر لكى يدافع عنه

وتخيل لو تمت مناقشة مشكلات المسلمين من ذل وخضوع وهوان فى الحج
او مشكلة القدس..
بين جميع فئات المسلمين
بالتاكيد بفضل الله سيكون هناك حل
فالجمعه ليست مقتصره لكى يدعوا الامام لرئيس الجمهوريه وملك البلاد
ولكى نذهب لننام فى المسجد
ونقضى صلاتنا بغير روح ثم نرجع لبيوتنا

والحج ليس لكى ندعوا لخادم الحرمين الشريفين فالحرمين ليسا ملكه او جزء من ثروته
انما هما للمسلمين جميعا

يكفى ان الله عزوجل امرنا بعد الانتهاء من صلاة الجمعه وفريضة الحج ان نذكره

قال تعالى

" فَإِذَا قُضِيَتِ الصَّلاةُ فَانْتَشِرُوا فِي الأَرْضِ وَابْتَغُوا مِنْ فَضْلِ اللَّهِ وَاذْكُرُوا اللَّهَ كَثِيرًا لَعَلَّكُمْ تُفْلِحُونَ"
الجمعه - 62- 10

" لَيْسَ عَلَيْكُمْ جُنَاحٌ أَنْ تَبْتَغُوا فَضْلا مِنْ رَبِّكُمْ فَإِذَا أَفَضْتُمْ مِنْ عَرَفَاتٍ فَاذْكُرُوا اللَّهَ عِنْدَ الْمَشْعَرِ الْحَرَامِ وَاذْكُرُوهُ كَمَا هَدَاكُمْ وَإِنْ كُنْتُمْ مِنْ قَبْلِهِ لَمِنَ الضَّالِّينَ "
البقره-2 - 198

لاحظ فى اية سورة البقره لفظ عرفات وهو الركن الاهم فى الحج كما قال المصطفى - صلى الله عليه وسلم - " الحج عرفه"
وهو الجبل الذى يجتمع عليه كل الحجاج فمكانه ووقته محدد خلافا لاى ركن اخر كالطواف او السعى
واسمه عرفه او عرفات جاء من المعرفه او التعرف

امرنا الله عزوجل فى الايتين الكريمتين ان نذكره بعد انتهاء صلاة الجمعه وركن الحج
ومن الذكر ايضا ان نتحدث فى مشاكلنا وما يهمنا ويخصنا فهى ليست مشكلة خاصه
بل هى مشاكل تخص جميع المسلمين
فالهوان والذل علينا جميعا من اولنا لاخرنا وليس على واحد منا فقط

ويكفى ان المسجد فى عهد رسول الله - صلى الله عليه وسلم - كان مكان لكل شىء
فهو اتخذه قاعدة لكل شىء حتى يتم كل شىء باساس صحيح و برضا من الله
فكان مكانا للسياسه والحرب والشعر والمرح
ولم يكن يقتصر على العبادة فقط

وكذلك فعل الصحابة من بعده


وحتى الصلوات الخمس من الافضل ان تتم فى جماعه فى المسجد
لان الدين الاسلامى اساسه الجماعه والاتحاد وليس الفرديه

ولكن فى وقتنا هذا اصبحنا نخاف الدخول للمسجد واصبحنا نهابه
واصبح الاجتماع فيه قضية امن دوله لاننا سنكون فى حالة تنظيم
والتنظيم يهدد استقرار البلاد وامنها وسيادتها

مجموعه لاتزيد عن خمسه اشخاص او سته اصبحت كتنظيم القاعده

والمشكله ليست فى تنظيم القاعده
انما عن استقرار اى بلد يتحدثون!

ماعلينا

حوار مع حمار

والله الواحد احتار يعمل الحوار مع انهى حمار

مع حمار الحكيم ولا حمار محمود السعدنى

وقلت اغير واعمل حوار مع سمكه بس لقيت الموضوع ده مكلف ومحتاج فلوس والواحد جيوبه منفضه

فلقيت موضوع الحمار اسهل وارخص

ومش محتاج غير شوية برسيم

ولما روحت اجيب البرسيم لقيته هو كمان غلى

يالا ماعلينا حمار حمار مش فارقه ومش خساره فيه حق البرسيم

المهم انه حوار ومع حمار وخلاص

...

تفتكر ليه مصلحة الطب الشرعى مش راضيه تحلل بقايا اللى ماتوا فى العباره

عشان مش فاضيين وبيثبتوا دلوقتى ان اخناتون يبقى ابو توت عنخ امون ورمسيس يبقى قريب مبارك من ناحية طول مدة الحكم

تفتكر ليه البحر الاحمر احمر

عشان احمر من الدم بتاع ضحايا العباره

مبارك وجمال مبارك بيقولوا مفيش توريث - تفتكر هم صادقين ولا بيكدبوا

اكيد طبعا صادقين -وهم دول حد يقدر يكدبهم- عشان جمال مش هايورث وعلاء هو اللى هايورث

تفتكر ايه العلاقه بين الشعب المصرى ونادى الزمالك

ال2 بياخدوا على دماغهم وماحدش سأل فيهم

تفتكر ليه الست اللى كلمت الريس فى مؤتمر الحزب الوطنى فرحانه ان الريس قالها انتى جامده

عشان اول مره تتعاكس وحد يعبرها

تفتكر لو خيروك حد ييجى يحلل جملة - انتى جامده - تجيب مين

اجيب طبعا مونيكا بتاعة كلينتون

تفتكر ابراهيم عيسى دعى ليلة القدر بإيه

اللهم انك عفو تحب العفو خلى مبارك يعفو عنا

تفتكر ايه أأمن طريقه تتخلص بيها من اولادك

انك توديهم المدرسه وهم مش حالين الواجب

تفتكر ليه المفروض نصدق نظيف فى كل اللى بيقوله

عشان القطنه مبتكدبش

تفتكر ليه الرؤوساء العرب كان نفسهم هيلارى كلينتون تفوز وفرحوا اوى لما تسيبى ليفنى كسبت فى اسرائيل

عشان من تقاليد الاستقبال- عند العرب خصوصا- البوس فكانوا هيهصوا ويزيطوا, وكمان اللى شافوه من رايس ومادلين اولبرايت مش شويه

تفتكر الطلبه ايه شعورها اتجاه قانون كادر المعلمين

اللهم لا شماتة

تفتكر لو باراك أوباما خلف ولد هيسميه ايه

اكيد يعنى هيسميه إيهود ولو الموضوع فيه قعده وتوريث مش بعيد يسميه جمال

تفتكر ليه السادات بياخد سيئات من عمايل مبارك

عشان هو اللى اختار مبارك نائب

تفتكر ليه مبارك يمكن يكون اكتر واحد عنده حسنات

عشان هو الاكيد اكتر واحد بينشتم

تفتكر ليه الحمام المكان الوحيد اللى يقدر الشعب يعبر عن رايه فيه بكل حريه فى ازهى عصور الديمقراطيه

اكيد عشان الشعب مزنوق ديمقراطيه

تفتكر ايه علاقة ان نظيف بيقول اننا شعب عاوز يتغيرله الحفاضه-شعب لم ينضج- وزنقة االديمقراطيه

اكيد ريحة الديقراطيه فاحت وعاوز يتغيرلنا

تفتكر ال3اهرمات بيرمزوا بايه لاعضاء الحزب الوطنى

للريس وابنه والسيده حرمه

تفتكر ليه الاهرام لازم تتقفل

عشان هم راسمين 3 اهرامات وهم 114 هرم

تفتكر ليه الجمهوريه لازم تتقفل

عشان بقت ملكيه

تفتكر نعمل ايه فى مذيعين عينة تامر حسنى ومفيد فوزى ومنى الحسينى واحمد المسلمانى

ولا حاجه - نحطهم فى كيس دم من بتاع هانى سرور وهو هايقوم باللازم

تفتكر ترد بايه على سوزان مبارك بانها بتقول مفيش تحرش فى مصر

ولا حاجه ابعتلها دعوه فيها تذكره لاتوبيس رايح شبرا

تفتكر ليه اوباما اتصل بمبارك وخد بالك اوباما هو اللى اتصل

عشان يساله ازاى يخليه لازق فى الكرسى

تفتكر ليه الحكومه خايفه من شباب 6 ابريل

عشان لسه باقى فى الشهر 24 غيرهم

تفتكر ايه السبب فى مرض جنون البقر

اكيد عشان مبارك اتسمى البقره الضاحكه

تفتكر الرؤوساء العرب اغنيتهم المفضله ايه

امريكا بعتلها جواب

امريكا ولاسالت فى

امريكا ماتحنى على

تفتكر فوز الاهلى للمره السادسه ببطولة افريقيا بيدل على ايه

اكيد بترشيح مبارك للدوره السادسه فى رياسته

تفتكر ليه المصريين متابعين قضية سوزان تميم ونفضوا لمحاكمة صدام , وليه تابعوا جنازة متولى ونسيوا جنازة المسيرى والمسير والمسلمين اللى بيموتوا فى كل مكان واننا بننسى اى مصيبه تحصلنا زى العباره

اكيد عشان مبقناش بنحس ومبقاش عندنا دم -احنا حصلنا 100مصيبه زى العباره والشعب متحركش يبقى شعب ميت

تفتكر ايه تعليقك على الناس اللى طلعت تستقبل الاهلى والمنتخب كل اما يفوز فى بطوله- ملهاش لازمه- او اللى طلعوا فى مظاهرات عشان تامر حسنى لما اتسجن ونفضوا او مش عارفين اصلا ان فى مظاهرات فى المحله وكفايه

انا لله وانا اليه راجعون - اللهم اجرنا فى شعبنا واخلفنا خيرا منه

تفتكر ليه اى حاجه هايفه بتحصل وملهاش اى فايده ولازمه يقلك الشعب المصرى ومصر كلها فرحانه

ولما مصيبه تحصل يقلك الشعب المصرى ومصر متأثر وزعلان

عشان مصر ملهاش صاحب

تفتكر جمال مبارك فى موضوع تمليك الاسهم بيقلد مين وايه تعليقك

حاجه من2
ياجمال عبد الناصر فى قانون الاصلاح الزراعى واقوله

ومهما دار الزمان او مال
هاتفضل ابن مبارك ياجمال

او بيقلد صابر فى فيلم عايز حقى وساعتها هاقوله

ياجمال يادزمه ياللى ملكشى لزمه

تفتكر تجيب مين تمثل قدام عادل امام اللى بيبوس فى كل مشهد وناقص يبوس المشاهدين" الستات طبعا بس

بما انها راحت عليها وبقت واحده فاضيه نجيب كونداليزا رايس

وياريت تبوسه عشان نخلص منه ونستريح هى مش ناقصه قرف

تفتكر شعار الحمله الانتخابيه بتاع مبارك اوابنه فى انتخابات2011هايكون ايه

كده 100 لون وكده 100 لون والكل سيربح المليون

تفتكر ايه رايك فى ان رئيسة الهند بتقول ان مبارك اهم زعماء العالم

ربنا يحفظنا - شكلهم بعد ماطلعوا ا لقمر وشافوه اتتجنوا ومخهم اتلحس

تفتكر الاهلى لما خسر قال الحكم وحش ولما فاز قال الحكم كويس - بيفكرك بايه الموضوع ده

بالحكومه والتقارير الخارجيه وخصوصا بتاعت حموم الانسان

تفتكر حزب الجبهه بعد ماالسادات سابه بقى تبع اى جبهه

شكله بقى تبع الجبهه الشرقيه

تفتكر ليه مصر مفيش اخبار عنها غير فى المحاكم ع الفضائيات

عشان مصر طالبه خلع من ريسها

تفتكر حركة كفايه وشايفنكم راحوا فين

شايفنكم مستخبيه وكفايه قالت كقايه

تفتكر فى امل

امل مات وكتب فى وصيته لا تصالح

مش عايز حقى

ذُكر فى كتب السيره
ان قريش عندما أرادت قتل سيدنا محمد (صلى الله عليه وآله وسلم )
اتفقت فيما بينها ان تختار من كل قبيلة شاب يكون نائبا عنها
كى يقتلوه بضربة رجل واحد
لكى لا تقدر قبيلة بنو هاشم على المطالبة بالثأر بدم سيدنا محمد (صلى الله عليه وآله وسلم )
فمهما كانت قوة اهل سيدنا محمد على القتال فهم لن يقووا على محاربة القبائل باكلمها
فالجريمه قد توزعت وكثر فاعليها ...
كذلك يفعل كل مجرم يعرف الناس انه مجرم وسارق ... فهو يشرك معه عدد معين من الناس او من خاصة الناس
لكى لا يستطيع احد ان يفتح فمه او يعترض

وكذلك يفعل الحكام مع شعوبهم ... وخصوصا الشعوب الضعيفه الغير قادره على أخذ حقها بيدها
فالشعب اذا ضعف وهانت عليه نفسه فلماذا لا يهون علي حاكمه ؟؟!
فهم يطبقون المثل القائل أطعم الفم كى تستحى العين
والشعب مات !!!
والميت ليس له عين او اى مشاعر
وهاذا مافعله مبارك وابنه وحكومته الرشيده
يريدون ان يشترك الشعب معهم فى جريمتهم
فبعد ان باعوا البلد ... بدون ان يستيشروا اصحاب البلد
وباعوها بلا شىء
وبلا اى قيمه
وقالوا لنا ان هذا هو الثمن الحقيقى لها
يريدون الان ان يشركوا اصحاب الارض معهم فى الوليمه
ان كان قد بقى وليمه
فقد صرح جمال مبارك انه يريد اشراك الشعب فى اسهم ماتمتلكه البلد لمن يريد !
ومن لا يريد يذهب نصيبه لصندوق استثمار من لايتعدى عمره 21 او الاجيال القادمه
هم يريدون ان نشترك معهم فى جريمتهم
يرشوننا بمالنا
بلا اى ذرة خجل منهم او ندم
هم درسونا جيدا ويعرفون اننا لن نعترض
او نفعل لهم شىء
بل بالعكس سنفرح بالمال الذى اعطوه لنا
ونشكرهم عليه كأنه هدية منهم !
هم يعرفون اننا نريد المال كى نصمت
كاننا كلاب تنبح وعندما ترى الطعام او العظام تتوقف عن النباح كى تأكل
يريدون فقط ان نشترك معهم فى الجريمه
فأطعم الفم كى تستحى العين
فاذا تجرأنا وفتحنا فمنا فلن نقدر
فنحن شاركناهم
واخذنا نصيبنا
فنحن مجرمون مثلهم واكثر منهم
كيف لنا ونحن شركاؤهم ان نعترض عليهم
فقصة فيلم عايز حقى تحكى عن شابا اراد حقه فى بلده
وعندما اخذه
وكان من غير اذن الحكومه بسبب انه عمل ضجه اعلاميه
[ الحكومه لا تعطى شيئا غصب عنهااو بغير اذنها - ولكن المخرج عاوز كده ]
كان يريد ان يبيع هذا النصيب والشعب اعطى له توكيل كى يبيع
وعندما اراد ان يبيع وفى المزاد عرف ان المشترى هو امريكا واسرائيل
فرفض البيع!!!
وهاجمه الشعب وسبوه [ ياصابر يادزمه ياللى ملكش لازمه ]
وانا اسال الاستاذ مبارك وابنه
واعرف انه لن يرد
لانه لن يسمعنى او يعرف اصلا انى موجود
والوحيد الذى ممكن ان يسمعنى فى حكومته الحبيبه هو جهاز امن الدوله
ماذا لو اراد احد افراد الشعب ان يبيع نصيبه
وكيف تحدد اعداد الاجيال القادمه
هل نعرف عددهم
وكيف سيتم توزيع الاسهم على الشعب
وكيف يتم تحديد نصيب كل فرد
وهل نصيبى مثل نصيب جمال مبارك
بصفتى احد افراد الشعب مثله
او احمد عز
فكلنا فى الدستور سواسيه
ونحن خير من يطبق الدستور!!!

انا وبكامل قواى العقليه ان كان مازال يوجد عقل
لا اريد نصيبى
مش عايز حقى
وسآخذه فى حالة لو كان نصيبى مثل نصيبك ياسيادة الرئيس
او نصيب ابنك او نصيب احد مستشارين ابنائك وخصوصا احمد عز
والا ساقول راى بكل صراحه فى بلد الديمقراطيه وانا اعلم انه لن يعجبكم ولن ترضوا به
لانه سيكون مثل راى الشعب فى صابر..
ياجمال يادزمه ياللى ملكش لازمه!!

لا نشعر بهم

عندما تتجه الى محطة القطار او المترو تراهم هناك
أو تمر مصادفة تحت كوبرى ما...
تراهم مستلقيين على الارصفه بلا غطاء
ملابسهم مرقعه
تكشف اكثر مماتغطي
اذا نظرت اليهم لا تخطئهم عينك
تعرفهم بسكوتهم الدائم ونظرتهم اليائسه من كل شىء
حتى يأسهم منك انت
فهم يعرفون انك تلبس نظاره سوداء ولا تراهم
مجرد سراب يعبر أمامك॥
واذا رايتهم يعرفون جيدا انك لن تقترب منهم
فأنت تخاف ان تقترب منهم او حتى تشعر بهم !
من بعيد فقط سيتم المشهد بينك وبينهم...
فهم فى حياتنا مجرد كومبارس لا نحس ولا نشعر بهم الا عند الحاجه فقط॥
اذا نظرت اليهم وتمعنت ستجد شريط يمر امامك فيه كل نعم الله عليك
ستشعر انك فى نعمه
ينظرون اليك نظرة لوم وعتاب
وانت تنظر اليهم نظرة شفقه
وتنظر لنفسك نظرة عجز
ستجد فيهم جميع الاشكال
القادر منهم يعمل فى القطار بائعا متجولا او ع الارصفه
والاطفال اما بائعين او متسولين
والنساء كالاطفال
المريض منهم غير قادر على تحريك حتى اصبعه
فيه جميع انواع الامراض
لو نظرت اليه تشعر برهبه كرهبة الخوف من اهل الكهف
هم جميعا شكل واحد
الرجال نفس الملبس وتسريحة الشعروالسيجاره بما فيهم الاولاد
والنساء نفس الجلباب والشعر المصبوغ بما فيهم البنات
॥من الواضح أيضا انهم صاروايعاملوننا مثل معاملتنا لهم
وصرنا ايضا كومبارسا فى حياتهم
!
فعندما تسمع ان طفله فى العاشره
خارجه من المدرسه فى يوم ممطر
متجهه للمنزل
وتتخيل ماذا ستصنع فى باقى اليوم من اكل ودروس خصوصيه ولعب
وفجاه تموت كل احلامها
والسبب انها لمست عمود كهرباء
فتصعق وتموت

ستحس بداخلك انك لاتشعر باحد
انك فى عالم غير العالم

واخرى تموت لانها سقطت من باب المترو
او انها فى رصيف محطة القطار غير آمن فانزلقت امام القطار
وترى زوجة و ام تجرى وراء زوجها او ابنها فى كل سجون مصر ومعتقلاتها كى تنظر اليه فقط وتطمئن عليه
او زوجة تسعى على لقمة العيش كى تربى اولادها بعد وفاة زوجها
او مطلقه تسعى خلف زوجها فى المحاكم لتاخذ نفقتها ونفقة اولادها
او رجل يتحمل عبء ركوب المواصلات فى شدة الزحام لكى يوفر لاهل بيته ثمن رغيف العيش

او رجل يمر فى الشارع بجوراك يتحدث لنفسه ويحسب كيف يستمر هذا الشهر وراتبه قد ذهب مع الريح ,ولا يعرف كيف سيُطعم اولاده بقية الشهر

او امرأه تقف فى طابور العيش وتتحمل جميع انواع الاهانه والتحرش كي توفر لزوجها ولاولادها

او طفلا صغيرا لا يتعدى العاشره يطلب مساعدة منك فى الشارع او انت بداخل سيارتك
وترى نفس هذا الطفل فى شارع اخر يدخن بكل شراهه كانه رجل فى الاربعين من عمره يتحمل كل هموم الدنيا

او اب طرده ابناؤه من بيته للشارع ولم يجد الا التسول طريقا له كى يعيش
او سيدة عجوز تقف فى طابور طويل ليس به اى انواع الراحه كى تستلم معاشها,الذى لا يكفيها لاسبوع واحد

او وانت تشاهد برنامج ما وترى شخصا مأخوذا حقه ولا يستيطع ان يرده , وترى دموعه امامك وهو رجل بكامل قواه او يوصف بانه
رجل ولكن امام مغتصبه يظهر كحمامه مذبوحه لا تسطيع ان تفعل شيئا الا ان تتحرك فى كل اتجاه قبل ان تلفظ انفاسها الاخيره

او تشاهد اهالى ضحايا العباره او القطاروهم يطالبون بجثث ابنائهم وبحقهم فى قضاء عادل يرد لهم حقوقهم

ستحس بانك لا تشعر بهم
كل الذى ستفعله انه تحركت بداخلك مشاعر
انك ستسب وتشتم السبب فى الاهمال
ولا تفعل غير ذلك
وتنسى انك ايضا سببا فى كل ذلك بسكوتك
فنحن ايضا لا نشعر بانفسنا
وهم لا يشعرون بنا

مدونات حكوميه

تخيل معايه لو اعضاء الحكومه كل واحد فيهم عمل مدونه
حكومه ذكيه بأه وماشيه مع التطور
وكمان هى مش اقل من الصين اللى ريسها بيفضى كل يوم نفسه وقت معين يكلم شعبه على الميل بتاعه
تخيل واحد فى ميله مليار و800 مليون شخص!
الراجل ده اكيد فاضى!
و الرشيده "والهاء ضمير عائد على حكومتنا "يعنى مش اقل من روسيا اللى بوتين عمل ميل لارسال شكاوى المواطنين
المهم ملناش دعوه بالعالم بتوع العالم الاول دول. احنا فى التالت ده حتى التالت فوق الاول!
نرجع لموضوع التخيل بتاعنا اللى احنا بنتكلم فيه اصل خلاص التخيلات خلصت مفضلش غير اننا نتخيل الحكومه
حب بقى ياجدع بس حب من طرف عاشر!
اتخيل معايه كده لو مبارك عمل مدونه على النت هيسميها ايه اكيد هيسميها البتاعه بتاعت البتاع
يعنى هى المدونه اللى هايفتكراسمها هى و اسم حزب الله كفايه عليه يفتكر اسم اسرائيل وامريكا
اقلك يسميها مش كفايه !
وياسلام بأه ياجدع
لو ابنه جمال يعنى مش علاء عمل مدونه اكيد بردوا شوف الثقه بقول اكيد هايسميها لا للتوريث.
وياعينى لو صفوت الشريف عمل هو كمان واحده
[ اقصد بواحده مدونه يعنى مش واحده واحده . بس تصدق هايبقى قمر . لذا وجب التنبيه لكلى لا يختلط الامر ]
هايسميها عصر الرياده الاعلاميه والديمقراطيه المتشففه جايه من الشفافيه يعنى واحلى حاجه فى العالم دى الشفافيه!.
وطبعا احمد نظيف هايزعل ويتقمص اشمعنى هو جت عليه يعنى وماله يعمل حقه الديمقراطى!

ويسميها القطنه مبتكدبش !
وزى ماالطويل عمل لازم القصير يعمل!
عملا بمبدأ المواطنه!
والمساواه بين جميع المواطنين!!

كتيره التعجبات صح ...
ويسمى مدونته.. عز الدخيله حراميه بإدينا
بمجهوده يعنى مش طالب مساعدة حد راجل عصامى بأه فى بلد حر يسمح بنمو الاقتصاد الحر!
وكله حر فى حر مع اننا فى اكتوبر॥
او يسميها يتربى فى عزه !
يتربى فى عزه احمد عزه
اسم شيك॥مش كده بذمتك
وطبعا رئيس مجلس الشعب اللى اوله مالوش علاقه باخره يعنى المجلس مالوش علاقة بالشعب
يعمله مدونه هو كمان ماهو مش قليل فى البلد ويسميها ترزى الموافقه ويحط رقم للى عاوز يفصل اى حاجه।

ومبارك دايما على حق
أقصد الزبون !
موافقه
॥ الزبون اللى بعده
وتماشيا مع التطور لازم مننساش قديمنا اللى قعد معانا اكتر من عشرين سنه
الحاج محمد سليمان الوزير" السابق" وده اكيد هايسمى مدونته اخرب بلدك بدل ابنى بيتك بتاعت عز.

وحبيب مجلس الشعب [ سابقا ] اللى بيغنى دلوقتى فرحه ماتمت خدها "عز" وطار।كمال الشاذلى اللى كرشه معدتش باين من ساعة ماساب المجلس والحكم
حلوه الحكم دى صح وكبيره عليه اوى "بس هو كان مصدق نفسه انها حكم " نمشيها الحكم عادى يعنى ..
يعمل هو كمان مدونه ويسميها حكومه محتاجه شعب ويحط الصوره الرئيسيه للمدونه تبريقة عينه اللى بيعملها لاى عضو فتح بؤه ايام زمان يعنى وقول للزمان يرجع يازمان॥
وبطرس غالى هو كمان يعمل مدونه بفلوسه
يرمى وزارته مطرح ماهو عايز ॥
ويسميها اجبلكم منين !
ومحمود محى الدين وده هيسمى مدونته
عواد باع أرضه ..
وختامه مسك بس مسك متعاص دم
الحاج حبيب العادلى وده طبعا هيسمى مدونته الشعب فى خدمة مبارك ,الوطن سابقا
بس خلاص

صحيح قبل مااقطع حبل التخيل
مانتخيل كل واحد فى دول اسم غير اسمه
يعنى مثلا مبارك نسميه قليل البركه عشان ده مفيهوش ريحة البركه اصلا
دول 30 سنه مفيش حبة قمح طلعت من ارضنا وتقولى بركه
البركه الوحيده اللى فى اسمه انه مونسنا من30سنه قابله للزياده ومش عاوز يقوم
وطالما هو مش عاوز يقوم
يبقى نسميه حوستى مبارك
وابنه جمال نسميه داخل شمال ياحوستى يامبارك !
وصفوت الشريف نسميه صفوت الحرامى عشان ده مفيهوش ريحة الشرف
واحمد فتحى سرور نسميه احمد فتحى كئيب بذمتكم سرور ايه اللى فى اسمه ده!
واحمد نظيف نسميه احمد غير قابل للتنظيف
واحمد عز نسميه ايه ده ماهو لو مكنش ده عز يبقى مين اللى عز بس نسميه احمد سارق عز بلده
وحبيب العادلى مش عارف ازاى اتسمى الاسم ده اسمه فيه عدل وحب
سبحان الله
وهو لافى ده ولا بيطبق ده
ع العموم نسميه مكروه الشعب।
وسيد طنطاوى شيخ الازهر اللى على ايده بقى ازعر
ده كفايه نسميه سيد منوفى ..
وكمال الشاذلى نسميه ناقص ماهى العالم دى مفيهاش كمال ولا جمال.


ماعلينا