هو ليه اللى عندهم مدونه او بلوج عملوا المدونه دى ...
منظره ولا تقليد ولا بجد عشان نفس كل واحد فيهم يطلع حاجه جواه .
ساعات بيبقى الواحد مخنوق اوى وجواه حاجات كتير نفسه يقولها
ومكبوت من جواه ، والكمبيوتر هو الحاجه الوحيده اللى بتسمعه والكيبورد الشىء الوحيد اللى يقدر ياخده فى حضنه من غير ماحد يقوله عيب .
يمكن موضة القلم والورقه بطلت وراحت عليها كتابة المذكرات يعنى وبقت بدالها موضة المدونات।
معظم المدونات أصحابها بيتكلموا فيها عن السياسه وحال البلد ...
وبيبقى وهو بيكتب حاسس بأمان شويه عشان بيقول رأيه من غير ماحد يعرفه او يحس بيه ، " شبح مختفى ورا شاشه"
بس مع زيادة موضوع الكتابه عن السياسه ده وكل واحد بأه بيقول رأيه اللى حاسس بيه ...
الحكومه خدت بالها وابتدت تطور نفسها هى كمان وتدخل لعبة المدونات بس بطريقتها طبعا
وعشان كده سمت نفسها الحكومه الذكيه !
المهم مش موضوعنا تسمى نفسها زى ماهى عاوزه هى أصلا مش حكومتنا .
الحكومه لما شدت حيلها على المدونيين وبتوع النت وزارة الداخليه يعنى
ابتدأ المدونيين يخرجوا من جحورهم واشتهروا ومعدوش أشباح بقواحقيقه وبقوا بيقولوا رأيهم زى الناس الطبيعيه
وطبعا الحكومه النظيفه الحبيبه خدتهم فى ضيافتها وشافوا أحلى كرم ضيافه !
ومع ظهور حركة كفايه ونشاطها فى الوقت ده وظهور معارضين للنظام وصحف معارضه - الحكومه مسمياهم "أعداء الديقراطيه والتقدم"
الموضوع اتعرف والصحف نشرت "مش القوميه طبعا اللى نشرت - القوميه كانت مسمياهم شوية عيال" وظهر المدونيين أول مره بأساميهم وشحمهم ولحمهم
واتعرفوا للناس وبقوا أبطال بيقولوا لا فى وش الظلم والحاكم الظالم .
وكل واحد فينا نفسه يكون بطل وعشان كده قلدناهم ، وكل واحد عمل مدونه ،
ولا بجد كل واحد جواه حاجه ونفسه يقلها
كل واحد فينا كان يتمنى يكون هو بهيه وقت ماهيكل اتكلم عنها وقال انا بستنى أى جديد .
يمكن بجد احنا أبطال ومش حاسين !
مستنيين بس لحظه معينه عشان نطلع البطل من جوانا
بس المشكله هنخلينا مستنيين اللحظه دى لحد ماتيجى
ولا هانروحلها احنا
ولا هى مش هتيجى أصلا؟!
ماعلينا
0 التعليقات:
Post a Comment