كل يوم بعرف ان الاحترام والاخلاق والكرامه
ملهمش علاقه بدين او جنس او حتى وطن
وبعرف ده لما ببص لماجده الرومى وفيروز
وبعدين ابص على هيفاء وهبى
وعرفت ده اكتر لما شوفت مظاهرات اليونان
ورجعت تانى بصيت ع خيبتنا
بتفرج على النيل للاخبار ولقيت فى شريط الاخبار
لقيت واحد اسمه حازم حسام او حسام حازم
والقناه كاتبه انه خبر حصرى
ان الاستاذ حسام ده قالهم ان جميع الخرائط تثبت ان غزه
ارض فلسطينيه !
ياريت اللى يعرف مين الاخ ده يقولى عشان نفسى اعرف هو جاب المعلومه الجباره دى منين
قبل ضرب غزه بيومين لقيتهم كاتبين فى شريط الاخبار ع الفضائيه المصريه اللى مشرفانا دايما
ان الريس دعى الاخت ليفنى للحضور الى مصر لمقابلته ...
وبعد ضرب غزه بردوا بيومين لقيت الحاج ابو الغيط بيقول ان لما نيفه هانم كانت هنا
قصدى الاخت ليفنى كانت هنا عشان نطلب منها عدم ضرب غزه و لتهدئه الوضع فى المنطقه
اه يانى يامنطقتى !
مكتوب فى شريط اخبار الجزيره ان رئيس وزراء قطر ابلغ ليفنى انه غير موافق ع ضرب غزه !
طيب ياعم الحاج طالما انت واصل كده وبتعرف تتكلم اهو ماتقلهم ان قطر هتقطع العلاقات اللى بينها وبين اسرائيل
اوع الاقل كلم بوش وقوله عن القواعد العسكريه اللى موجوده فى الخليج وخصوصا فى قطر ..
وهو من الاصل كان فى حد سألك عن رايك !
مكتوب كده فى الاهرام
زوجة الشهيد(مرات الظابط المصرى اللى اتقتل فى رفح)
حماس قتلت زوجى !
وخد بالك مراته هى اللى قالت
يالا ربنا يصبرها ويصبرنا احنا كمان ع الاهرام
وانا بتفرج ع المظاهرات بتاعت غزه
(لسه جوايا خوف انى اطلع المظاهرات)
لقيت واحد بيقول بكل مافيه يسقط يسقط حسنى مبارك
حصلتلى حالة فرح ومش عارف ليه افتكرت محمد وفيق فى فيلم شىء من الخوف
وهو بيقول باطل .. باطل
اللى طلعوا مظاهرات غزه مش المفروض الاول نحرر مصر
وبعدين نحرر القدس وغزه
ونحرر نفسنا من الحصار اللى الريس معيشنا فيه
ولا انتم كاتبين فى اليفط .. مصرى محاصر
كمشاركه معنويه يعنى !
بموت ع نفسى من الضحك وانا بتفرج على نشرة الساعه 9
بتاعت القناه الاولى وهى بتتكلم عن حماس كأنها هى اللى ضربت اسرائيل
وخصوصا هناء السمرى دى عسل عسل يعنى
ياخراشى !
الامارات عامله 3 ايام حداد وقافله الفضائيات بتاعتها
عشان واحد مات عندهم باين من العيله المالكه
ولما 400 يموتوا فى غزه ده غير العراق وافغانستان متديش حتى نص يوم حداد اجازه للعيال
اكيد دم العيله المالكه غير دم شهداء غزه بردوا !
قناة الناس كاتبه غزه فى قلوب الناس .. يافرحتى بقلوب ميته
وقناة الرساله نازله سحب فلوس ع حس غزه برسايل الموبايل
وقناة اقرأ مقضياها شريط دعاء
والشات ع قنوات التانيه حاجه تعر وتكسف
بجد جتها نيله اللى عاوزه خلف زى خلفنا .. فكرونى بقصيدة نزار قبانى متى يعلنون وفاة العرب
أحاولُ منذُ بدأتُ كتابةَ شِعْري
قياسَ المسافةِ بيني وبين جدودي العربْ.
رأيتُ جُيوشا...ولا من جيوشْ...
رأيتُ فتوحا...ولا من فتوحْ...
وتابعتُ كلَ الحروبِ على شاشةِ التلْفزهْ...
فقتلى على شاشة التلفزهْ...
وجرحى على شاشة التلفزهْ...
ونصرٌ من الله يأتي إلينا...على شاشة التلفزهْ...
أيا وطني: جعلوك مسلْسلَ رُعْبٍ
نتابع أحداثهُ في المساءْ.
فكيف نراك إذا قطعوا الكهْرُباءْ؟؟
لحد دلوقتى جمال مبارك متكلمش عن غزه
وسرور وصفوت الشريف سكتم بكم ..
ربنا يستر !
حد يفهمنى ياريت..
ايه الجديد يعنى لما غزه تنضرب ؟
ماقبلها رام الله انضربت وفلسطين كلها ولبنان
والعراق والبوسنه وافغانستان والمسلمين فى كل مكان متهانين
حتى فى مصر متهانين
على راى حسن حسنى فى فيلم ليلة سقوط بغداد
افتح يابنى القوس ومتقفلوش ...
يعنى احنا متعودين ع كده
والحمد لله بقينا جبلات ومعندناش دم !
الاخ احمد المسلمانى اللى دايما علطول فاكر نفسه جايب الديب من ديله
كان بيتكلم عن اوباما وانه قال ان اسرائيل زى بناته!
ياريت الاخ الامور يتفرج على حلقاته ورأيه فى اوباما ايام الانتخابات
وقبل مااوباما ينجح عشان يشوف هو كان بيقول عنه ايه ...
الهبله العبيطه منى الحسينى نفسى اعرف بجد جنس جبلتها ايه الست دى
وهى قاعده وسامعه بودانها المسيحى بيقلها انا غير معترف بسيدنا محمد كرسول
والبهائى شمتان فيها وقاعد يضحك عليها عشان عارف انها مش هاتقدر تفتح بؤها
لا وتقوله بكل بجاحه فى حرية وكل واحد حر !
طالما كل واحد حر كده يافالحه جايبه البهائى ده ليه ونازله فيه اسئله رخمه زيك وعامله فيها راجل
وحامى حمى الدين ...
شاطره تتشطرى عليه .. سبيه ع الاقل ده بيقول انا معترف بسيدنا محمد كرسول
جتك خيبه انتى والمسلمانى فى يوم واحد
السيد الوزير احمد ابو الغيط .. احب اعرف سيادتك من انهى غيط بالظبط !
الحاج ابومازن قال عن مشكلة الحجاج الفلسطينين اللى اتحجزوا فى معبر رفح
ان اللى منع الحجاج كان كفار قرش ... وسعادته يقصد حماس
احب ابشر سيادته ان كفار قريش اسلموا والحمد لله !
هو ليه صحيح كل اللى فى فلسطين اسمه ابو !
من فيلم ليلة سقوط بغداد ...
الثوار دايما عايشين تحت فى البدروم وعمرهم ماطلعوا فوق
من فيلم ليلة البيبى دول ( العبيط اوى اوى اووووووى يعنى) ...
الاشتراكيه هى العدل والعدل هو اننا نقسم لحمة الحمير بينا وبين الاسود بالتساوى
فيلم جنينة الاسماك ...
فكرته حلوه بس كان ممكن يتعمل ابسط من كده بدل الرموز والرمزيات اللى المخرج مالى بيها الفيلم
وعاوز مخ فاضى عشان يفهمها
لما الزمالك خرج من الكاس واتغلب من بنى عبيد
حسيت ان لاعيبة بنى عبيد دول هزموا اسرائيل فى الحرب
مش عارف والله اضحك ولا اعيط ع خيبتنا التقيله
الحاجه الوحيده اللى استفدناها من ضرب غزه
ان جمهور الاهلى والاسماعيلى اتصالحوا !
ع فكره بعد الماتش باين اتخانقوا .. يعنى يافرحه ماتمت
عادة الحكومه ولا هاتشتريها .. اى ازمه تحصل لازم تخلى معاها مشكله فى الكوره
ايام ازمة العيش طلعوا مشكلة الحضرى
ودلوقتى عاملين مشكلة الزمالك وحسام وابراهيم ...
نفسى بجد اعرف ابوتريكه عمل وقدم ايه لمصر ؟!
الدمعه كانت هتفر من عينى لما عرفت انه ساب فلوس السعوديه عشان خاطر مصر والجماهير
هو لامؤاخذه يعنى الاخ هيلعب فى مصر ببلاش يعنى ولا ايه
!
بيقلك عمرو زكى مفرحش لم دخل اخر جون _ لا وايه بيقلك انه سجد سجدة شكر لربنا
ازاى يعمل كده ؟
ازاى يسجد لربنا وميفرحش
اخوه بأه فسر الموضوع ده بان عمرو زعلان لانه بأله كتير ملعبش ومسجلش اجوان
ياحينى ياعموره
فلتلك 100 مره انت وميدو متنسوش تغيروا بليل واستعملوا بامبرز عشان تخلوا دايما اسم مصر عاليا رفرافا
فى سماء الهيافه !
كان التليفزيون السعودى لذيذ اوى وعسل جدا لما كان عامل تقرير عن العيديه فى مصر
فى نفس الوقت اللى كان بيجلد فيه الدكتور المصرى !
بس العيب مش فى السعوديه .. العيب علينا احنا اننا سايبين واحد اسمه مبارك يعمل ريس علينا
سعادته سافر وناقش الاوضاع فى المنطقه والشرق الاوسط والعلاقات الاخويه بين البلدين
ومكلفش خاطره يسأل عن اخبار المصريين هناك او حتى عن قضيه الدكتور
بس اكيد سعادته ميعرفش عشان هو بينام بدرى ومبيلحقش اونكل تاموره فى البيت بيتك !
سمعت من واحد والله اعلم انهم مسكوا ف السعوديه مهندس مصرى جاسوس
ونفسى اسال الجهابذه بتوع السعوديه .. مصر هتجسس ليه عليكم ؟
يمكن نفسها مثلا فى تأشيرة حج زياده !
بيقلك السعوديه بتلم تبرعات لغزه ..
مع ان امريكا وانجلترا كانوا طالبين مساعده من دول الخليج عسان الازمه الاقتصاديه
جتنا القرف هنفضل طول عمرنا شاحتين وبخلاء
حتى احنا فى شهر المحرم مش رمضان كمان ...
وبردوا فكرونى بمتى يعلنون وفاة العرب ..
أنا...بعْدَ خمسين عاما
أحاول تسجيل ما قد رأيتْ...
رأيتُ شعوبا تظنّ بأنّ رجالَ المباحثِ
أمْرٌ من الله...مثلَ الصُداعِ...ومثل الزُكامْ...
ومثلَ الجُذامِ...ومثل الجَرَبْ...
رأيتُ العروبةَ معروضةً في مزادِ الأثاث القديمْ...
ولكنني...ما رأيتُ العَرَبْ!!...
الناس اللى شكرت النواب على تاشيرات الحج
لامؤاخذه يعنى هم دافعين حقها من جيب ابوهم ...
مكتوب كده ع يفطه متعلقه فى نص الشارع .. اللى بيحب مصر ييجى معانا_ لجنة المرأه فى الحزب الوطنى الديمقراطى
كان نفسى اعمل بايدى حركة ابراهيم حسن اللى كل ماتش بيعملها
بس لقيت كل الناس بتبصلى
ضحكت ومشيت وقلت فى نفسى الحمد لله ان اعضاء الحزب زى ماالحكومه بتقول انهم 2 مليون بس
يعنى فى 78 مليون واحد مش بيحبوا مصر !
حاجه تطمن صح ..
الشعب العربى اللى هاجم مصر فى كل حته وعمل مظاهرات قدام السفارات المصريه وكسرها وحرق علم مصر
بسأل سعادتكم هى مصر منعاكم يعنى تروحوا تحاربوا ..
ولا انتم سايبين الحمار وبتتشطروا ع البردعه !
استغربت لما ماقالوش فى اسرائيل ان شيخ الازهر رجل سلام وياريت كل المصريين زيه
زى مابيقولوا علطول عن مبارك
واستغربت اكتر ان شيمون بيريز مازروش لما تعب ودخل المستشفى !
الناس اللى بتتكلم عن المقاطعه
ياريت تقاطع المنتج المصرى كمان ..ده ان كان فى اصلا حاجه ببتتصنع فى مصر !
الناس اللى فرحت اوى ان بوش اتحدف بالجزمه فكرونى بالنكته باللى بتحكى
عن واحد امريكى وواحد عربى
فالامريكى بيقول للعربى : احنا بلدنا بلد حريه وديمقراطيه ومن حقنا ننقد الرئيس الامريكى ونشتمه كمان
العربى رد عليه وقاله : وايه يعنى مااحنا كمان نقدر فى بلدنا نشتم الرئيس الامريكى !
المنتخب الامريكى اللى هايواجه منتخب مصر فى كاس القارات ناوى يتعاقد مع رئيس وزراء العراق المالكى
بعد ماشافه وهو بيصد ببراعه ضربة الجزمه عن بوش
وهايوقفه مخصوص فى ماتش مصر ...
نفسى اعرف ازاى بوش وطى لما الفرده الاولى اتحدفت عليه .. وموطاش لما التانيه اتحدفت واستنى لحدما
رئيس الوزراء حاشها عنه
سبحان الله !
بصراحه بوش ده اثبت انه راجل كفاءه
فى ظرف اسبوع رد ضربة الجزمه بضربة صواريخ
وريحة الشراب ردها لحد دلوقتى ب400 شهيد !
ده غير اللى ااستشهدوا فى العراق وافغانستان ..
امال لو الجزمه برباط كان عمل ايه !
احنا ليه دايما بنقول عن اهل فلسطين بس هم اللى شهداء
واهل العراق وافغانستان او اى منطقه تانيه نقول قتلى
كأنهم مش مسلمين
!
صائب عريات او احمد قريع باين .. المهم حاجه فيها قرع وخلاص
قال بعد ضرب غزه ان كده المفاوضات بين فلسطين واسرائيل انتهت
وهو من امتى اصلا كان فى مفاوضات ياعم الحاج
صباح الخير بلييل يابه!
احلى حاجه فى حكومتنا انها دارسانا كويس وسيبانا نعمل مظاهرات ونعمل
اللى احنا عاوزينه اليومين دول
من يسقط يسقط حسنى مبارك لحد ملايين الملايين على غزه رايحين
عشان عارفه اننا مش هنقدر نشيل حسنى مبارك دلوقتى
واننا جبناء ومفيش واحد هايطلع حتى من بيته لحد رفح عشان غزه
عارفه اننا شعب كلام يعنى ..
وبعد ما الهيصه تخلص هتلم كله ...
اظن موضوع غزه ده جه ع الطبطاب للاخوان عشان تبين فيه مرجلتها
اللى هى مفقتقداها اصلا ..
وكلعاده مش هاتعرف تعمل حاجه غير شوية شعارات وهتافات وبس !
عشان الصراحه راحه ياحاحا
وانت مباتعرفش !
تحس ان الفلسطنين اتعودوا ع الضرب والغارات وبأه شىء عادى
انهم يكونوا محتلين علطول
واحد من المصابين بيقول انا كنت واقف جنب مدرستى والقنبله وقعت على
ورجلى اتقطعت وبيسال هو ذنبه ايه !
والتانى قاعد يقول هدموا بيوتنا وشردوا عيالنا
حسيت بخيبه ...
النهارده واحده من فلسطين من اهل غزه بتقول بكل عزه وفخر وكبرياء
انا وولادى واهلى ومالى وبيتى فى سبيل الله
وان شاء الله ربنا يعوضنى عنه ببيت فى الجنه طوبه من دهب وطوبه من فضه
ومهما عملوا مش هنتنازل عن ارضنا
فرحت وقلت الحمد لله
بس حسيت بعجز .. حسيت اننا معدتش فينا رجاله ولا نخوه ولا شجاعه
او حتى ذرة دم ..
يَا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الأَرْضِ أَرَضِيتُمْ بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ
التوبة 9 38
بس خلاص
